वलांडी प्रतिनिधी.
बिदर जिल्ह्यातील हुमनाबाद तालुक्यातील मोलकेरा गावात मोळगी मारय्या मंदिर रस्त्यावर संशयास्पद वस्तूचा स्फोट होऊन शाळेत जात असलेल्या मुलांसह ६ जण गंभीर जखमी झाल्याची घटना अत्यंत दुर्दैवी आहे.
जिल्हा पालकमंत्री ईश्वर खंडरे यांनी जखमींवर उपचार सुरू असलेल्या बिदर शहरातील गुरू नानक हॉस्पिटल तसेच ब्रिम्स हॉस्पीटल येथे भेट देऊन त्यांच्या प्रकृतीची विचारपूस केली. जखमींना तातडीने आणि सर्वोत्तम उपचार देण्याच्या कडक सूचना वैद्यकीय अधिकाऱ्यांना दिल्या.
घटनेबाबत तपास सुरू असून, तपास अहवाल प्राप्त होताच कोणत्याही अधिकाऱ्याने निष्काळजीपणा केला असल्यास त्यांच्यावर कठोर कारवाई करण्यात येईल, असा इशारा मंत्र्यांनी दिला.
जखमींच्या संपूर्ण उपचाराचा खर्च शासनाकडून उचलण्यात येणार असल्याची हमी देण्यात आली आहे. अशा प्रकारची घटना पुन्हा घडू नये यासाठी संबंधित विभागांना आवश्यक प्रतिबंधक उपाययोजना करण्याच्या सूचना देण्यात आल्या आहेत.
जखमी लवकर बरे व्हावेत, अशी पालकमंत्र्यांनी सदिच्छा व्यक्त केली.
