वलांडी | प्रतिनिधी
देवणी तालुक्यातील जिल्हा परिषद गट व पंचायत समिती गणासाठी २०२६ च्या सार्वत्रिक निवडणुकीचे मतदान शनिवार, दि. ७ फेब्रुवारी रोजी पार पडले. संपूर्ण तालुक्यात देवणी पोलीस ठाण्याचे सहाय्यक पोलीस निरीक्षक भिमराव गायकवाड यांच्या नेतृत्वाखाली कडक पोलिस बंदोबस्त ठेवण्यात आला होता. किरकोळ प्रकार वगळता मतदान प्रक्रिया शांततेत व सुरळीत पार पडली.
देवणी तालुक्यातील एकूण ८३ मतदान केंद्रांवर ४९८ मतदान कर्मचारी, १२ झोनल अधिकारी, २६१ पोलीस कर्मचारी, ,१ पोलीस निरीक्षक १ सहाय्यक पोलीस निरीक्षक, ८ पोलीस उपनिरीक्षक तसेच राज्य राखीव दलाची एक तुकडी तैनात करण्यात आली होती. एकूण ७१,६७७ मतदारांसाठी हा व्यापक बंदोबस्त उभारण्यात आला होता.
वलांडी जिल्हा परिषद गटात एकूण ४४०४ मतदारांपैकी १२६३ महिला व १३७३ पुरुष मतदारांनी आपला मतदानाचा हक्क बजावला. त्यामुळे वलांडी गटात ५९.८५ टक्के मतदान झाले. मात्र १७६८ मतदारांनी मतदान न केल्याने लोकशाही प्रक्रियेपासून ते वंचित राहिले.
शासनाकडून मतदान जनजागृतीसाठी मोठ्या प्रमाणावर निधी खर्च केला जात असताना सुजाण मतदारांनी मतदान न करणे हे भारतीय संविधानाच्या मूल्यांना धरून नसल्याची भावना अनेक नागरिकांनी व्यक्त केली.
दरम्यान, तालुक्यातील अतिसंवेदनशील समजल्या जाणाऱ्या जवळगा गटात देवणी पोलिसांच्या सतर्क नियोजनामुळे कोणताही अनुचित प्रकार न घडता ६०.८४ टक्के मतदान शांततेत पार पडले.
एकंदरीत, देवणी तालुक्यात जिल्हा परिषद व पंचायत समिती निवडणुकीसाठी मतदारांनी मोठ्या प्रमाणावर सहभाग नोंदवत लोकशाहीचा उत्सव शांततेत साजरा केला.
