प्रतिनिधी/ वलांडी
तालुक्यातील जवळगा येथे दि ६ मार्च रोजी अरविंद पाटील निलंगेकर यांच्या वाढदिवसानिमित्त सामाजिक उपक्रमाच्या माध्यमातून जवळगा येथे मोतीबिंदू तपासणी व शस्त्रक्रिया शिबिराचे आयोजन करण्यात आले. हे शिबिर उदगीर लायन्स क्लब, उदगीर यांच्या वतीने आयोजित करण्यात आले होते. या उपक्रमामुळे परिसरातील अनेक नागरिकांना नेत्र तपासणी व मोफत उपचाराची सुविधा उपलब्ध झाली.
दि. ६ मार्च रोजी आयोजित करण्यात आलेल्या या तपासणी शिबिरात एकूण ७५ नागरिकांची नेत्र तपासणी करण्यात आली. तपासणीदरम्यान मोतीबिंदू आढळलेल्या २० रुग्णांची निवड शस्त्रक्रियेसाठी करण्यात आली. या सर्व रुग्णांवर दि. ७ मार्च रोजी उदयगिरी लॉयन्स नेत्र रुग्णालय, उदगीर येथे मोफत मोतीबिंदू शस्त्रक्रिया करण्यात आली.
या शिबिरामुळे ग्रामीण भागातील गरजू नागरिकांना मोठा दिलासा मिळाला असून अनेकांनी या उपक्रमाचे स्वागत केले.यावेळी माजी जिल्हा परिषद सदस्य प्रशांत पाटील, माजी सरपंच तथा प्राचार्य डॉ. रामलिंग मुळे, इस्मालवाडीचे सरपंच पांडुरंग बिरादार, माजी सरपंच हणमंत बिरादार, सुरज मुळे, रंगलाल धूत, नरसिंग बोडके, गोविंद वळसंगे, दयानंद पाटील आदी मान्यवर उपस्थित होते.
या उपक्रमाच्या यशस्वी आयोजनासाठी आयोजकांनी सहकार्य करणाऱ्या सर्वांचे आभार मानले.
