प्रतिनिधी वलांडी
आज दि. ८ फेब्रुवारी २०२६ रोजी देवणी येथील औद्योगिक प्रशिक्षण संस्था आय टी आय येथे मतमोजणीची रंगीत तालीम यशस्वीरीत्या पार पडली. उद्या दि. ९ फेब्रुवारी २०२६ रोजी सकाळी ठीक १० वाजता आय टी आय देवणी येथे मतमोजणी प्रक्रिया सुरू होणार आहे.
मतमोजणी प्रक्रिया पारदर्शक, अचूक व सुरळीत पार पडावी, यासाठी आज मतमोजणी संदर्भातील सविस्तर प्रशिक्षण व रंगीत तालीम घेण्यात आली. यामध्ये मतमोजणी कक्षांची मांडणी, टेबलनिहाय प्रक्रिया, कर्मचारी नियुक्ती, सुरक्षा व्यवस्था तसेच निकाल जाहीर करण्याच्या कार्यपद्धतीबाबत सविस्तर मार्गदर्शन करण्यात आले.
या प्रशिक्षण कार्यक्रमासाठी मार्गदर्शक म्हणून श्री. गणेश पवार निवडणूक निर्णय अधिकारी यांनी उपस्थित कर्मचाऱ्यांना आवश्यक सूचना दिल्या. यावेळी तहसिलदार तथा सहायक निवडणूक निर्णय अधिकारी देवणी मा. सोमनाथ वाडकर उपस्थित होते. त्यांनी मतमोजणी कर्मचाऱ्यांना जबाबदारीने व नियमांचे काटेकोर पालन करून काम करण्याचे आवाहन केले.
देवणी आय टी आय येथे होणारी मतमोजणी शांततेत, पारदर्शक व प्रशासनाच्या काटेकोर देखरेखीखाली पार पडणार असल्याची माहिती प्रशासनाकडून देण्यात आली.
