मोहरम सणानिमित्त वलांडी येथे शांतता समितीची बैठक संपन्न
वलांडी | प्रतिनिधी
देवणी तालुक्यातील वलांडी येथे आगामी मोहरम सणाच्या पार्श्वभूमीवर शांतता, सुव्यवस्था व कायदा-सुव्यवस्था अबाधित राखण्यासाठी वलांडी पोलीस दूरक्षेत्रात शांतता समितीची बैठक आयोजित करण्यात आली. ही बैठक देवणी पोलीस ठाण्याचे सहाय्यक पोलीस निरीक्षक (सपोनि) अनिल खोडेवाड यांच्या मार्गदर्शनाखाली पार पडली.
बैठकीत मोहरम सणादरम्यान निघणाऱ्या पंजा व सवारी मिरवणुका निर्धारित वेळेत, शिस्तबद्ध व शांततेच्या वातावरणात पार पाडाव्यात, असे आवाहन सपोनि अनिल खोडेवाड यांनी केले. कोणत्याही प्रकारचे गैरप्रकार, वाद-विवाद किंवा कायदा-सुव्यवस्थेला बाधा पोहोचेल असे कृत्य टाळून सर्वांनी प्रशासनाला सहकार्य करावे, असेही त्यांनी सांगितले.
मोहरम सणाच्या कालावधीत गावात अवैध देशी दारू विक्री व सेवनावर विशेष लक्ष ठेवण्यात येणार असून, शांतता व सामाजिक सलोखा कायम राखण्यासाठी आवश्यक ती प्रतिबंधात्मक कारवाई करण्यात येईल, अशी माहितीही त्यांनी दिली.
यावेळी गावातील माजी सरपंच राम भंडारे, बाजार समितीचे अध्यक्ष उमाकांत नागलगावे, अरुण पाटील, जनार्धन पिंजरे, धनराज बिरादार, पत्रकार विविध सवारी प्रमुख तसेच गावातील प्रतिष्ठित नागरिक मोठ्या संख्येने उपस्थित होते.
